Intayon Cabugao

Higante a bigao naiparang iti “Kawayan Festival” iti Cabugao, Ilocos Sur

Ilocos Sur (7 May) -- Naitampok ti nalaga a bigao manipud iti bolo (maysa a klase ti kawayan), nga addaan iti kalawa a 79 a metro kuadrado ken addaan ti sangapulo (10) a metro a diametro para iti Kawayan Festival iti maika – innem nga Rambak Intayon Cabugao ita a tawen.
Ti maibilang a kadakkelan a bigao a nakadata nga inpuesto ti 50 nga umili iti Cabugao iti agarup lima metro ti katayagna a naipakder a kawayan a kas tukolna ket naimuntar iti daya nga abagatanen a paset ti Cabugao Central Park (CCP), kangrunaan a plasa ti ili, sakbay a nangrugi ti piesta idi Abril 19, 2007.
Idi malem ti Mierkoles, Abril 25, 2007, para kadagiti nagkaadu a bilang ti turista, umili ken bisita saan a lapped kadakuada ti darang ti agtindeken nga init iti agarup alas-kuatro iti malem ti panagturongda iti igid ti “national highway” tapno imatanganda dagiti agkakalaing a sumasala a makisalip iti “kawayan festival street dancing.
Nagsardeng amin a lugan iti agsumbangir nga ungto ti national highway a masakupan ti sentro iti a ili a kinagiddan ti panakaipatayab ti maysa a tokar a mangipasimudaag iti panangrugin ti panagsala ken panagparada dagiti makisalisal.
Iti met CCP saan met a mailaksid kadagiti adu a tao nga agur-uray ti idadateng kadagiti street dancers ti panangmatmatda ti maibilang a kadakkelan a nalaga nga bigao.
Iti mismo a sango ti munisipyo, immunan a nagsala a magmagna dagiti kameng ti Cabugao dancer’s club. Pinanornorda ti national highway, sa nagin-inayad a simmaruno ti maysa nga owner – type jeepney a nakaimuntaran ti sound system nga agto-tokar.
Naikayab dagiti bigao nga iggem dagiti kameng iti umuna a grupo dagiti makisalisal manipud iti Lipit High School, Cabugao a kinagiddan ti panagkinni a panagsalada a magmagna ket sinarunoda ti lugan.
Lima amin a grupo dagiti agsasalisal a buklen dagiti grupo a kas panagsasagannadda: Grupo manipud Lipit High School, Grupo ti Barangay Salomague, Grupo ti Barangay Nagsicaoan, Grupo manipud Turod National High School, amin dagitoy a grupo ket naggapu iti ili ti Cabugao; ken ti Grupo manipud iti ili ti San Juan, akin abagatan a kabangibang nga ili ti Cabugao.
Adda kabukbukodan nga estilo ti tunggal grupo a nakisalisal kas mayataday iti tema ti Kawayan Festival a nakasentro kadagiti ramramit a naaramid manipud iti kawayan (Bamboo Craft) kas koma iti bigao, panagikawes iti arkos a naaramid manipud iti kawayan ken dadduma pay. Saba-sabali met ti estilo ti panagsalada: adda nakinni, adda agmartsa ken adda ag-dance exhibition.
Iti ilalabas ti kada grupo, kasta unay ti panagtipat ken panagiriag dagiti agbuy-buya iti igid ti national highway. Adda met dagiti turista ken umili nga agretrato ken ag-video kadagiti street dancers.
Kas resulta, inyalat ti grupo ti ili ti San Juan ti umuna a puesto ket immawatda iti P25,000.00 gunggona, maikadua ti grupo ti Barangay Nagsingcaoan immawat ti P15,000.00 a premio, maikatlo ti Lipit High School immawat ti P10,000.00 a premio, maikapat ti Turod National High School immawat ti P5,000.00 consolasion a gunggona, ken maikalima ti Barangay Salomague immawat ti P5,000.00 consolasion a gunggona.
Ti Kawayan Festival ti kangrunaan tema ti maikanem a Rambak Intayon Cabugo Fest. Maikadua daytoyen a kawayan festival sipud pay nairugimi ti Rambak Intayon Cabugo Fest idi 2002. Immuna a naaramid ti kawayan festival idi 2003.
“Ti kangrunaan a gagemmi a nangisayangkat ti Kawayan Festival iti ili a Cabugao ket isu ti panangitandudomi kadagiti produktomi a naaramid manipud iti nadumduma a klase ti kawayan, nga isu ti binigbig ti Department of Trade and Industry (DTI) a kas One Town One Product (OTOP) ti ilimi a Cabugao,” kinuna ni Mayor Dioceasar Suero.
“Malaksid iti “Kawayan Street Dancing Festival” a pakaiparangan dagiti produktomi manipud iti kawayan, nagpalagakami pay iti higante a bigao nga impuestomi iti CCP tapno inkam’ iparang ti ipagtangtansitmi a bigao nga aramid iti Cabugao,” innayon ni Mayor Suero.
Ti higante a bigao ket inaramid ti walo a tao manipud Barangay Nagsingcaoan iti las-ud iti walo nga aldaw a naka –usaran ti tallo gasut (300) a binukel a bolo, 40 a pedaso ti rattan, 4 a sanganayon a kawayan - siitan ken sangapulo a metro a lanut ti labtang.
Ti higante a bigao, segun kenni Manang Julie Cayso - maysa a manursurso iti Nagsingcaoan Elementary School ken anak ti aglaglaga, ket makalaon iti agarup ti dua gasut ket onse (211) a katao.
Babaen iti daytoy a naaramid dagiti umili ti Cabugao, plano ti mayor nga ipalista ti ili ti Cabugao iti Guinness Books of World’s Record nga nakaaramid iti kalawaan wenno kadakkelan a bigao iti sangalubongan iti masangsanguanan a panagpiesta iti ili.
Segun kenni Mayor Suero, agarup 80 a porsiento iti kadagupan a 33 a barangay iti Cabugao ket aglag-laga wenno agar-aramid kadagiti ramramit manipud iti kawayan (Bamboo Craft). Dagitoy a bar-barangay ket masarakan iti akindaya a paset ti ili. Panaglaga wenno panagaramidan kadagiti ramramit manipud iti kawayan (Bamboo Craft) ti kangrunaan a pagsapulan dagiti agnaed kadagitoy a bar-barangay.
Dagiti produkto manipud kawayan nga ar-aramiden dagiti umili ti Cabugao a kas koma kadagiti sumaganad: muebles wenno sala set, bigao, labba, basket ken tug-tugaw ket mailak-lako iti Northern Ilocos Sur Trade Center – merkado publiko ti Cabugao, ken dadduma pay a kabangibang nga ili ken probinsya.
Tapno naan-anay a mapadur-as ti teknolohia a mangipangato ti kalidad dagiti produkto ti Cabugao manipud iti kawayan, nangisayangkat ti LGU Cabugao babaen iti pannakitulong ti Technological Education and Skills Development Authority (TESDA) ken ti DTI ti maysa a panagsanay para kadagiti aglag-laga wenno agar-aramid kadagiti ramramit manipud iti kawayan (Bamboo Craft).
Nangbangon pay ti gobierno munisipal ti nursery a pag-patonaran ti maimula a kawayan. Kangrunaan a maimul-mula dagitoy a kawayan iti igid ti karayan tapno masaluadan ti panagriggaay iti daga ken addanto pagalaan dagiti umili iti kasapulan da a materiales para iti bamboo crafts making.
Segun kenni Manang Julie, positibo ti nagbalin a bunga dagitoy a suporta ti gobierno munisipal para iti panakapadur-as ti industria ti panaglagaan wenno panagaramidan kadagiti ramramit manipud iti kawayan (Bamboo Craft) iti Cabugao a kas kangrunaan a pagsapulan dagiti umili.
“Saanen a mailibak a ti ili ti Cabugao ti maysa kadagiti lugar iti Ilokos a paggapuan dagiti nalagda ken agkakapintas a bigao, labba ken muebles iti pagilian,” kinuna ni Manang Julie.
Impanamnama met ti Mayor Suero ti agtul-tuloy a suporta ti munisipyo kadagiti programa nga ad-adda pay a mangpadur-as ti industria ti Bamboo craft iti Cabugao.